DESA ADAT NYUH KUKUH. 1418

Sabtu, 25 November 2023

Pura Desa Adat Nyuh Kukuh

I Wayan Lugra 15.43.00 Tidak ada komentar

Pura Desa Adat Nyuh Kukuh puniki sampun manut kadi ketatwaning tata titi sang anangun Khayangan minekadi tri khayangan utawi khayangan tiga sane ketah pinaka sarat ring sajeroning nangun Desa Adat ring Bali puniki. Pura puniki magenah nepek ring tepining catus pata, sakemawon mangkin sampun tan kapikanten malih catus pata rehning margine wantah kantun tigang lajur. Manut pidartan para panglingsir Desa Adat Nyuh Kukuh yata kocap sane riyin marga tiga punika wantah Catus Pata sadaweg kantun wenten Desa Toyapakeh, sadwaning Desa Toyapakeh punika sayan sue sumingkin ngirangin kraman ipun, punika mahawinan Desa Toyapakeh kraman ipun raris kagapukang ring Desa Ped wastu mangkin puniki Banjar Nyuh sane sampun dados Desa Adat Nyuh Kukuh ma Desa Dinas ring Desa Ped.

Kawiyaktiannyane Pura Desa puniki wantah Pura Desa Toyapakeh duke riyin sadurungnyane Banjar Nyuh kegapukang ring Desa Ped, riantukang Batan Nyuh pinaka salih sinunggil Banjar ring Desa Toyapakeh sane ngawidangin makudang kudang Banjar inggih punika wenten Banjar Gebang, Banjar Sublang, Banjar Dalem, Banjar Teba, Banjar Batan Nyuh, raris kegapukang kraman ipun dados asiki kewastanin Banjar Nyuh sane mangkin sampun dados Desa Adat Nyuh Kukuh, mawastu Pura Desa Toyapakeh kaempon lan kaupira pinaka antuk Krama Banjar Nyuh/Desa Adat Nyuh Kukuh pinaka waris wit Desa Toyapakeh.

Pura Desa Adat Nyuh Kukuh taler madue palaba Pura minekadi tanah pekarangan sane mangkin sampun aepahan dados padruen Krama sangkaning katumbas, sane aepahan wenten kaselang antuk krama kaanggen pekarangan Paumahan lan wenten keanggen pekarangan Sekolah Dasar 3 Ped sane sampun magingsir ke tanah Pemerintah Provinsi Bali.

Kadi asapunika sida kasinahang indik kawentenan Pura Desa Adat Nyuh Kukuh puniki.